الرواية : #مدينة_الأحلام
الكاتبة : #نورهان_البسيوني
دار النشر : #نيسان_للنشر_والتوزيع
أم بتحلم بالفستان الأبيض 👰♀️تشوف بنتها لابساه
مستقرة فى بيت جوزها ما هى من وجهة نظرها خدنا ايه من العلام 👩🏼🏫
عريس متريش يهنن ويستت 💵😎
ولا شغل ليل ونهار وعيشة مرار👩🏻💻
حلم ميرنا مش زى أغلب البنات
عايزة تحقق احلامها هى مش أحلام الست نادية اللى هى ماحققتهاش
عايزة ترفرف فى الفضا على رأى الست وردة
بس ياترى هى مهيأة للإقلاع 🛫
بتقولك 👈🏻👈🏻 "بصيص الأمل وحلم الهجرة كان بحثاً عن غد أفضل" بعيدا عن التحكمات والسيطرة ووجع الدماغ
وجتلها الفرصة تطير ✈️ على برلين
والعيون رسمت 🎨 فراشات 🦋 كتير
وتخيلت نفسها عايشة فى سيناريوهات زى اللى فى الروايات
ركزى يا ميرنا على تحقيق الذات واثبات أنك قادرة على التحدى علشان نفرس الست نادية ونوريها أننا strong independent اماااااال
ياترى ميرنا هتحتاس وتفرهدنا هناك ولا هتبقى قد المشوار 💪🏻
رواية كنت مترددة ابداها يمكن علشان لون غلافها مع عنوانها🤔 ادانى ايحاء أنها فعلا مدينة الأحلام وأحلام مش عادية لا ديه وردية 🌸 كمان 😄
وأنا ماليش فى هذه الأجواء
بس تشجعت وقولت نجرب لون جديد واحنا ونصيبنا مع " نورهان " 😄
هتكلم عن الفكرة البداية بسيطة بنت بتحلم بعد التخرج 👩🏻🎓 بالهروب من سيطرة وزن الأم فبتلجأ للسفر اللى جالها على طبق 🍽️ لحد عندها
ومن النقطة ديه حياتها بتتغير
طبعا تخيلت سيناريو أنها هتقابل فارس الأحلام
ويبدوأ وصلة من الرومانسيات مع تحديات والحب يعمل المعجزات وكده بس ثانكس جاد مكانتش كده 😄
بالعكس حبيت التعبيرات كانت ماتموعش النفس 😀 وخلصتها فى يوم ونص 🤷♀️الفكرة اللى اخدتنى ليها الكاتبة مع بطلتها حبيت تفاصيلها ووصفها للمشاهد كأنك عايش معاها فى قلب الأحداث ..
نيجى للى ما عجبنيش
📌كان فيه تصرفات فى اواخر الرواية كانت مش منطقية بالنسبة ليا خاصة أن البطلة سنها صغير يعنى يادوب لسه متخرجة وبتبتدى حياتها بس يمكن تصرفاتها نابعة من فكرة " هتمرد على الوضع الحالى " بصوت عمرو دياب 😁
📌النهاية جات سريعة ومخطوفة ومش واخدة راحتها يعنى ما انتوا متغلبوناش فى ايميلات رايحة جاية فيها رغى طول الوقت وجايين فى الاخر تنهوها بـ FYI ديه the end 🤷♀️
📌 الغلاف تعليقى عليه أنه ادى الرواية طابع رومانسية خام بلونه الوردى وده مش صح لأن الرواية مش ده تصنيفها .. وده هيخلى أصحاب الذوق الإجرامى والسايكوباتى والتشويقى والتوترى زى حالاتى يمتنعون عن قراءة 📖 العمل 😉
الخلاصة 😄 علشان طولت كتير كانت تجربة لطيفة اتبسطت بها وماحسيتش معاها بملل لاول عمل لـ " نورهان البسيونى " واتعلمت برضه أن مش دايما الغلاف بيبان من عنوانه وهى هتفهم قصدى 😉
📌كانت تحلم بالنهايات السعيدة وتؤمن بها وتريد أن تحصل على واحدة فى حياتها. أم أنها لا توجد إلا فى الأفلام 🎬
#مكتبة_دنيا
#قراءات_٢٠٢٤
إرسال تعليق
0 تعليقات