الرواية #روح_أختها

الكاتبة : #سارة_الجندي

عدد الصفحات : ١١٩

دار النشر : #دار_فكرة_للنشر_والتوزيع


📌 الأم 🧓🏻مصدر الأمان والإستقرار 🤗 منبع النور 💡فى حياة أبناءها 👩🏻🧑🏻‍🦱أتصبح هى سبب الظلام 🌌والتيه 🙄 والظلم والحرمان 🥺


ظلم كبير وقع على "لمياء" وعيلتها 

بس ياترى مين اللى ظالمها 🤷‍♀️

ولا تكونش هى اللى ظلمت روحها مع ولادها 

لما جت عليهم وسيطرت على حياتهم 

مين فهم الآباء أن التحكم فى الأولاد بيبقى حب واهتمام 

خوف عليهم من غدر الزمان 

ارسم 🎨 حياتك أنت الأول ولونها بكل الألوان لكن ماتفرضش عليهم شخبطتك وتقولهم كده الرسمة تمام 👌🏻 

حط رتوشك لكن ماتبوظ اللوحة 

وسيب كل واحد فيهم يظبط ألوان حياته زى ما هو حابب

ماتفرضش عليهم دراستهم وتقولهم اصل ده مستقبلكم 

ماهو مش هيسلك فيها صدقنى لو دماغه مش راكبة عليها 🤷‍♀️

ما تجوزيش بنتك للى شايفاه مناسب لعيلتك 

ولا تطبخلها طبخة وتأكليها ليها بالعافية 

ما هى لو مابتحبش البامية هترجعها كمان شوية 🤮


ظلم وطال الكل وعقد الناس من بعض 

اللى داس على بنته وعايشها فى شخصية غيرها 

بحجة خوف من الأيام اللى جاية 

واللى ظلمت بنتها بإهمالها وسبتها لغيرها يحبها


واللى جت على ابنها وخليته شخصية مهزوزة وماشى فى ظلها علشان يبرها ما هى ماسكة فى نغمة التضحية 

ياترى ضحيتى بجد ولا كل اللى عملتيه طلع فى الآخر أنانية …


ظلم ورا ظلم هيقع فيه أبطال الرواية ياترى هيلاقوا المخرج ولا هيفضل الظلم طايلهم وراضين بحالهم للنهاية 

أصل الظلم واقع من الكبار اللى بيشوفوا نفسهم خاليين من الأخطاء وعلى الأبناء السمع والطاعة ويمشوا على المزاج وإلا يبقوا عاقين ومابيسمعوش الكلام ..

كتير هيعترض على كلامى بس حقيقى الأهل أوقات بيبقوا أنانيين ومش شايفين 😞

رجاء راجعوا علاقتكم مع الاولاد وبطلوا دور التنظير وأنكم دايما اللى فاهمين 

شبعوهم حب وحنان واهتمام مش أوامر وتحكمات 

الاحتواء أهم من الكاشات على أى حال 

بتطلعوا أجيال معقدين من أتفه التعاملات اللى عملتوها زمان 🤦🏼‍♀️


📌 رواية اجتماعية بسيطة جدا جدا فى اسلوبها ولغتها

القصة سريعة فى احداثها الكاتبة مستعجلة شوية وهى بتكتبها يعنى واحدة واحدة يا سارة وادى لكل حدث راحته مش مستعجلين احنا قاعدين😄 علشان من كتر السرعة فيه أحداث ماكنتش عارفة تدخل جوا الدماغ 😊


📌 الشخصيات كتير والعلاقات دخلت فى بعضها حبتين فـ ورقة 📝 وقلم واكتب مين ابن مين علشان ممكن تتوه..وتنسى اصلا أنت مين 🤷‍♀️

📌 عندى استفسارات فى كام حدث ماوضحش ليا أسبابهم ومش هينفع اسردهم علشان ماحرقش الرواية .


📌 حبيت الموضوعات اللى ناقشتها الكاتبة بس زى ما قولت محتاجة شوية تروى فى السرد وتدى لكل حدث فرصته فى الرغى 😄

📌 النهاية كانت مُرضية لكل ظالم نهاية ونهايتهم كانت مناسبة لأفعالهم 👌🏻

وربنا يقويهم على عيشتهم بعد كم العقد والكلاكيع اللى قابلتهم 🤦🏼‍♀️🤲🏻


#مكتبة_دنيا

#قراءات_٢٠٢٣

لينك جروب الcorner

https://www.facebook.com/groups/736128243892265/?ref=share&mibextid=KtfwRi

لينك الرواية للقراءة

https://readingistheanotherlife.blogspot.com/search/label/%D8%B1%D9%88%D8%A7%D9%8A%D8%A9%20%D8%B1%D9%88%D8%AD%20%D8%A3%D8%AE%D8%AA%D9%87%D8%A7?&max-results=9